ایک نیوز :پنجاب حکومت کے ترجمان اور صوبائی وزیر اطلاعات عامر میر نے اڈیالہ جیل میں سینئر امریکی عہدیداروں کی پاکستان تحریک انصاف کے چیئرمین سے ملاقات کے دعوے کو جھوٹ کا پلندہ قراردیدیا۔
نگراں وزیراطلاعات پنجاب عامر میر نے کہا کہ چیئرمین پی ٹی آئی سے اڈیالہ جیل میں کسی امریکی عہدیدار کی ملاقات نہیں ہوئی، اس حوالے سے چوہدری پرویز الہٰی کا دعوی بے بنیاد ہے۔نگراں وزیراطلاعات پنجاب نے مزید کہا کہ جیل میں کسی بھی قیدی سے ملاقات کے لیے وزارت خارجہ اور وزارت داخلہ کی اجازت درکار ہوتی ہے۔
انہوں نے بتایا کہ عمران خان سے ملاقات کے لیے کسی غیر ملکی ڈپلومیٹ نے کبھی درخواست نہیں دی، اگر ملاقات کی درخواست ہی نہیں آئی تو ملاقات کیسے ہوگئی۔
نگراں صوبائی وزیر عامر میر نے مشورہ دیا کہ چوہدری پرویز الہٰی جھوٹی کہانیاں گھڑنے سے اجتناب کریں۔
The recent claim by Ch Pervez Elahi that some senior US officials met Imran Khan at Adiala jail in Rawalpindi is totally baseless. No such meeting request has ever been received from any foreign diplomat, and no such meeting has ever taken place.
— Minister Information Punjab (@MinisterInfoPb) November 18, 2023
یاد رہے کہ چند روز قبل سابق وزیراعلیٰ پنجاب چوہدری پرویزالہٰی نے عدالت میں پیشی کے موقع پر صحافیوں سے گفتگو کرتے ہوئے دعویٰ کیا تھا کہ اڈیالہ جیل میں عمران خان سے امریکی عہدیداران، یورپین یونین کے نمائندوں اور آئی ایم ایف وفد نے ملاقات کی۔
پرویز الہیٰ کے دعوے کے بعد جیل سپرنٹنڈںٹ اور محکمہ جیل خانہ جات کے ترجمان نے اس کی تردید کی تھی اور بتایا تھا کہ عمران خان سے کسی بھی غیر ملکی نے ملاقات نہیں کی، چیئرمین پی ٹی آئی سے صرف اہل خانہ اور وکلا کی ملاقات ہوئی ہے۔