نوازشریف کی قربانیوں کو خراج تحسین پیش کرتے ہیں،شہبازشریف 

ایک نیوز:نامزدوزیراعظم شہبازشریف کاکہنا ہے کہ جمہوریت کیلئے نواز شریف کی قربانیو ں کو خراج تحسین پیش کرتے ہیں۔
مسلم لیگ ن کی پارلیمانی پارٹی کے اجلاس سے خطاب کرتے ہوئے شہباز شریف نے کہا کہ کامیاب ارکان اسمبلی اور سینیٹ ممبران کو میاں نواز شریف اور اپنی طرف سے دل کی اتھاہ گہرائیوں سے مبارک باد پیش کرتا ہوں۔ 
شہباز شریف نے کہا کہ آزاد امیدواروں کے شامل ہونے سے مسلم لیگ ن کی 104 سیٹیں قومی اسمبلی میں ہو گئی ہیں۔ ہمارے ارکان اسمبلی اپنے بل بوتے پر جیت کر آئے ہیں، مسلم لیگ ن نے ملک بھر میں کامیابی حاصل کی ہے۔
نامزدوزیراعظم کاکہنا تھاکہ قائد نواز شریف نے 2017 میں بجلی کی لوڈشیڈنگ کا خاتمہ کر دیا تھا، قائد محمد نواز شریف ملک میں سی پیک کے منصوبے لے کر آئے۔چاروں صوبوں کو موٹر وے کے ذریعے جوڑا، دیامربھاشا ڈیم کیلئے زمین خریداری کے لیے فنڈز جاری کیے۔
شہباز شریف نے کہا کہ میاں محمد نواز شریف کی قیادت میں دہشت گروں کا خاتمہ کیا گیا، کراچی میں امن قائم کرنے والے نواز شریف کو کراچی والے دعائیں دیتے ہیں، نواز شریف نے تمام منفی طاقتوں کا مقابلہ کیا، سارے جبر کا مقابلہ بڑے حوصلے کے ساتھ کیا۔ محترمہ بے نظیر شہید ہو گئیں کسی نے جی ایچ کیو کی طرف دیکھا نہیں، جب نواز شریف بیمار ہوئے تو کس طرح کی غلیظ زبان استعمال کی گئی، نواز شریف نے جیل کاٹی، مریم نواز کو بھی جیل میں لے جا یا گیا۔
نامزدوزیراعظم کاکہنا تھاکہ محمد نواز شریف نے صبر اور جوانمردی کے ساتھ مشکلات کا مقابلہ کیا، نواز شریف کے کئی ساتھی ہار گئے جہاں پر ہم ہارے وہ ٹھیک ہے اور جہاں جیتے وہ غلط ہے۔  آپ پوچھیں گے کہ آپ نے 16 ماہ میں کیا کیا؟ تومیں کہوں گا ہم نے پاکستان کو دیوالیہ ہونے سے بچایا، میں منتخب ہونے والے تمام ممبران کو ایک مرتبہ پھر مبارک باد پیش کرتا ہوں۔
اس موقع پر صدر ن لیگ شہباز شریف نے نواز شریف کو خراج تحسین پیش کرنے کی قراردار پیش کی۔