ایک نیوز:سربراہ عوامی مسلم لیگ اور سابق وفاقی وزیر داخلہ شیخ رشید احمد نے کہا ہے کہ پیپلزپارٹی نے الیکشن90 دن کے اندر کرانے کا مطالبہ کر کے سیاست میں ہلچل پیدا کر دی ہے۔
تفصیلات کے مطابق سربراہ عوامی مسلم لیگ اور سابق وفاقی وزیر داخلہ شیخ رشید احمد نے سماجی رابطے کی ویب سائٹ ٹوئٹر پر اپنے بیان میں لکھا ہے کہ چیف جسٹس سپریم کورٹ سے چیف الیکشن کمیشن کی 2 گھنٹے طویل ملاقات کا اعلامیہ جاری نہیں ہوا لیکن الیکشن کمیشن نے کہا کہ عام انتخابات 90 دن میں نہیں ہو سکتے اگلے سال ہوں گے۔
انہوں نے کہا کہ پیپلزپارٹی نے الیکشن90 دن کے اندر کرانے کا مطالبہ کر کے سیاست میں ہلچل پیدا کر دی ہے، ایسے لگتا ہے صرف ن لیگ ہی الیکشن میں تاخیر کی حامی رہ جائے گی باقی سب پارٹیاں 90 دن الیکشن کرانے پر اکٹھی ہو جائیں گی اور سپریم کورٹ کا دروازہ بھی کھٹکھٹائیں گی۔
چیف جسٹس سپریم کورٹ سے چیف الیکشن کمیشن کی 2 گھنٹےطویل ملاقات کا اعلامیہ جاری نہیں ہوا لیکن الیکشن کمیشن نے کہاکہ عام انتخابات 90 دن میں نہیں ہو سکتے اگلےسال ہوں گےpppنےالیکشن90 دن کے اندر کرانےکامطالبہ کرکے سیاست میں ہلچل پیدا کر دی ہے ایسے لگتا ہے صرف ن لیگ ہی الیکشن میں تاخیر…
— Sheikh Rashid Ahmed (@ShkhRasheed) August 18, 2023
سابق وفاقی وزیر کا کہنا تھا کہ نگران کابینہ میں سے سوائے سرفراز بگٹی کے کسی کو نہیں جانتا اور نگران کابینہ صرف الیکشن کی نگران ہے، لمبا چوڑا پالیسی ساز فیصلہ نہیں کر سکتی لوگ بچوں کو زہر دے رہے ہیں پھندے پر لٹک رہے ہیں نہ بجلی کے بل کے پیسے ہیں نہ آٹا خرید سکتے ہیں۔
انہوں نے کہا کہ جڑانوالہ کے واقعہ نے دنیا میں پاکستان کو بہت رسوا اور بد نام کیا ہے اس کی جتنی مذمت کی جائے کم ہے، مجرموں کو سخت سزا دی جائے، 16 گرجا گھر جلے اور پولیس تماشہ دیکھتی رہی، غریب سیاسی ورکر کے بیوی بچے ملازم کو اُٹھانا ہو چادر چار دیواری کو نیست و نابود کرنا ہو اور گھروں میں تشدد کرنا ہو تو ان کے دائیں ہاتھ کا کام ہے۔
سربراہ عوامی مسلم لیگ کا مزید کہنا تھا کہ گیند سپریم کورٹ کے کورٹ میں چلی گئی ہے، آئین و قانون اور ملک کو بچانا ہے یا خانہ جنگی کی بھینٹ چڑھانا ہے یہ فیصلہ سپریم کورٹ سے ہی ہو سکتا ہے، لوگ مایوس ہوگئے ہیں اور ہمت ہار گئے ہیں، اللہ تعالیٰ پاکستان اور پاکستان کے لوگوں پر رحم فرمائے.