ایک نیوز : نگراں وزیر تجارت گوہر اعجاز نے کہا کہ ملک میں ڈالر کی حقیقی ویلیو 260 جبکہ مہنگائی کے حساب سے قیمت 200 روپے بنتی ہے۔
کراچی چیمبر آف کامرس میں تقریب سے خطاب کرتے ہوئے نگراں وزیر تجارت گوہر اعجاز نے کہا کہ حکومت نے ڈالر سمیت دیگر اشیا کی اسمگلنگ رکوا دی ہے اور اب ڈالر کی قدر بڑھنے نہیں دیں گے۔
انہوں نے کہا کہ ملک میں فی ڈالر حوالہ ریٹ 350روپے تک پہنچ گیا تھا جبکہ انٹربینک ریٹ بھی 350روپے تک جاتا نظر آرہا تھا، پھر حکومت نے اقدامات کیے تو قیمت کم ہونا شروع ہوئی جس کا سلسلہ آج تک جاری ہے اور مستقبل میں بھی جاری رہے گا۔
اُن کا کہنا تھا کہ جن درآمدات پر پابندی عائد کی ان ہی اشیا کی درآمدات میں اضافہ ہوا،درآمدات پر پابندی سے افغان ٹرانزٹ ٹریڈ کا حجم 4 سے بڑھ کر6ارب ڈالرہوجاتا ہے۔
گوہر اعجاز کا کہنا تھا کہ جن اشیا پر ٹیکس بڑھایا وہ افغان ٹرانزٹ ٹریڈ سےآجاتی ہیں، ہم نے خود گرے مارکیٹ کو فروغ دیا ہے۔