ایک نیوز: دورہ سری لنکا کے لیے فاسٹ باؤلر شاہین شاہ آفریدی کی پاکستان اسکواڈ میں واپسی ہوئی ہے۔
رپورٹ کے مطابق سری لنکا کے خلاف 2 ٹیسٹ میچز کی سیریز شاہین شاہ آفریدی کے لیے خاصی اہمیت اختیار کر گئی ہے کیونکہ وہ اس دوران اپنی ٹیسٹ وکٹوں کی سنچری مکمل کر سکتے ہیں۔شاہین شاہ آفریدی کو ٹیسٹ میچوں میں وکٹوں کی سنچری مکمل کرنے کے لیے صرف ایک وکٹ درکار ہے۔
شاہین شاہ آفریدی کے ٹیسٹ ڈیبیو کے بعد سے کوئی بھی پاکستانی باؤلر ان سے زیادہ وکٹیں نہیں لے سکا ہے۔شاہین شاہ آفریدی نے ٹیسٹ ٹیم میں واپسی پر خوشی کا اظہار کرتے ہوئے کہا ہے کہ ایک سال بعد دوبارہ ٹیسٹ ٹیم میں واپسی پر خوش ہوں۔ ٹیسٹ کرکٹ سے دوری کو بہت زیادہ محسوس کر رہا تھا اور اس فارمیٹ سے دور رہنا بہت مشکل ہوگیا تھا۔
شاہین آفریدی کا کہنا ہے کہ سری لنکا میں گزشتہ سال انجری کے بعد سے پورا ہوم سیزن ٹیم سے باہر رہا اور اب سری لنکا ہی میں واپسی ہو رہی ہے۔ اس واپسی کو یادگار بنانے کے لیے پُرامید ہوں اور ساتھ ہی ٹیسٹ کرکٹ میں وکٹوں کی سنچری کی تکمیل کا بھی منتظر ہوں۔فاسٹ باؤلر نے کہا کہ اپنے مداحوں کا شکر گزار ہوں جنہوں نے مشکل وقت میں بھرپور سپورٹ کیا۔