ایک نیوز :تحریک انصاف کے ممبر قومی اسمبلی ناصر خان موسی زئی نے قومی اسمبلی میں واپس آنے کا اعلان کردیا ۔
تفصیلات کےمطابق نجی ٹی وی سے گفتگو کرتے ہوئے ناصر خان موسیٰ زئی نے کہا کہ عدم اعتماد کےبعد عمران خان نے پی ٹی آئی ارکان سے رائے لی تھی جس میں سے 80فیصد ارکان نے اپوزیشن میں بیٹھے کی رائے دی تھی بعد میں عمران خان نے شیخ رشید کے جذباتی جملوں میں آکراستعفوں کا کہہ دیا ۔
انہوں نے مزید کہا کہ میں نے عدم اعتماد کے وقت عمران خان کا ساتھ دیا تھا ۔ اسٹیبلشمنٹ چاہتی ہے کہ ملک میں جمہوریت برقرار رہے ، شریعت کے خلاف قانون سازی پر جے یو آئی نے آواز اٹھائی اس لئے میں جے یوآئی میں جارہا ہوں ۔
ناصر موسیٰ زئی نے دعویٰ کیا کہ جنرل قمر جاوید باجوہ نے حکومت بنانے اور چلانے میں عمران خان کی مدد کی۔عمران خان فوج کی مدد کے بغیر حکومت نہیں بنا سکتے تھے ۔ چیئر مین پی ٹی آئی نے اپنے محسنوں پر ہی خودکش حملہ کر دیا ہے۔
ان کا مزید کہناتھا کہ اسمبلی اجلاس تک چلانے کے لیے اسٹیبلشمنٹ کے لوگ ممبران اسمبلی کو بلاتے تھے۔اسٹیبلشمنٹ نے جتنی پی ٹی آئی کی مدد کی اتنی کسی حکومت کی مدد نہیں کی۔
واضح رہے کہ گزشتہ دنوں ایم این اے ناصر موسیٰ زئی نے پی ٹی آئی چھوڑ کر جمعیت علماء اسلام (جے یو آئی) میں شامل ہونے کا فیصلہ کیا تھا۔تاہم انہوں نے اس کا ابھی تک باقاعدہ اعلان نہیں کیا ،ناصر موسیٰ زئی کا کہنا تھا کہ آئندہ ہفتے مولانا فضل الرحمان کی موجودگی میں جے یو آئی (ف) میں شمولیت کا اعلان کروں گا۔